Batatapas Parintir...

Asa kada parnah pang mun kaya ini, tagal lantaran di kiyau urang paksa ai di datangi, itu gin mahadangi jua am satumat.
“ anu…, printirku nang ganal tu kada mau test print nya, apanya yu?
“ tahu am tu, coba ai di pariksa”
“ mun kaya itu, pariksa akan ja, sarah ikam ja kayapa kah asal mau baik”
“ ayu ai mun kaya itu”

Asa minik jua pang mun malihat parintir nang ganal gaduk nitu, mudahan ai kawa jua surang ma udaknya.
Bamula ai nah.
Mahidupi ai dahulu handak malihat nih, napa garang pungkala.
“ ieehhh….dasar babanaran kada mau tes print sakalinya, ini pasti rigat tu sinsurnya”
Nah bamula matan situ jua am akhirnya tunggal butingan di paculi sagala baut mambaut sampai tabarabak, tatilanjang parintir urang tu tadi. Habis parkara! Tinggal mancarii ja lagi nang mana sinsur karatas nang handak di barasihi, nang mana sinsur cartridge nang pacang disapui, tunggal butingan pulang di cabuti sampai lungui…kada tahu kisah.
Imbah sudah kadada lagi nang pina di babarasihi, bamula ai pulang mambulikakan ka asal tunggal butingan, asa minik pulang…
Mbahanu tatinggal baut sabigi, mbahanu balabihan, bungkar pulang, kaka itu haja tu, bilang lambat banar hanyar tuntung, mbahanu kada kawa mangancang tali dinamo saurangan tapaksa minta ganii wan ampunnya…kada tahu ai…tampulu kawa di palar, palar haja, tanyaman jua sadikit, asa tacabut kasusuban sadikit, maraha! Bagaduh hah…
Sampai tuntung babanaran, tabulik kaya asal, umaa….ai sukur banar kawa mambulik kakan, jaka kada ieh….dimapa pang surang…
Tagal nang ngaran surang asa yakin ja tabulik, dasar tabulik jua ai.., napang ti jar ku.
Asa mambuang kalimpanan jar urang tu. Kaya pa pang rasa.
Imbah tuntung parintir nang ganal gaduk itu surang barabak wan sudah di bulik akan ka asal, bagus pang sudah mau haja tuh, tulak pulang surang ka wadah kawan.
“anu…kam, parintirku ni hanyar dua hari manukar! Sudah kada mau lagi mam print, napa yu”
“ kalo pang rodanya tapacul” jar ku
“ bisa ai lih, cuba pang itihi akan mang”
“ hadang dulu, cuba hidupi pang satumat” sambil manyucuk kabal listrik.
“ nah, kaya itu pang”
“ kada salah lagi, ini pasti ada nang tapacul, bungkar haja lah”
“ hi-ih, bungkar ja, asal mau baik kah, aku kada wani mambungkar, samalam tahambur-hambur kada kawa tabulik”
“uhhh…mintu ah”

Bagamat ai surang mamulai babubungkar parintir canon ip1990 pun inya ni, higa mahiga tibing parintir ku kuit matan bawah wan ubing, ku tapak ka muka tapacul, mbahitu baut muka dua buting ku cabut, ku kuit kakait balakang, ta angkat ai, pacul jua, hanyar sabarataan baut baut nang ada ku paritil habis, tiwas suruh mambungkar! Lagi…
Sakalinya bujur jar ku tadi ada nang tapacul, jadi kada kawa mamprint, ni pang urangnya nang tapacul, sambil manampayakan wan inya.
“ kawa lah sakira kada tapacul lagi”
“ kawa haja, asal pas ma andak nya pisit” jar ku manambahi
“ satumat ai kalo mamasangnya”
“ bah…, gampang haja kada ngalih banar jua”
“ mun kaya itu, aku ambil lagi lah sabigi, pun ku nang sabuting nya rusak jua”
“ i-ieh…, ambil haja, kita pariksa ai jua”
Rahat surang lagi ma udar parintir, inya tulak ba ju-uk ma ambilakan nang sabutingnya.
Baluman datang inya, parintir nang surang udar tadi sudah tabulik ka asal, wan jua kawa mam print, balalu ba ungut ai mahadanginya datang…
“ sudah kah mang”
“ sudah! Anu nya banarai nang tapacul”
“mbah…ni baiklah sudah?
“ cubai ja pakai, kada papa lagi tu”
“ minum dulu mang!
“ ya” sambil ma ambil ka galas nang ba isi teh panas.
Ada nang sabuting nya tadi canon jua, tapi lain ngaran nya banarai[ip 1880 ], kada mau jua di tis, surang itihi, ieh sakalinya banjir wan tintah.


Surang hamburakan pulang tunggal butingan, surang suruh tapas! Napang ada.
Nyaman barasih, biar kalihatan hanyar pulang.
Bulik ka rumah kahujanan, jimus jua ieh awak, untungnya kada manggigil.
Di rumah sabuting jua mahadang parintir Epson PHOTO RX510 infus,


bilang kada kalihatan printir nitu, napang mun bacalimut wan tintah kasitu kamari wan dabu-dabunya ha pulang, mau kada mau surang pasti manapas.
Tunggal butingan pulang mambarabak, ingat kah kadakah mambulikakan asal tabarabak, imbah tuntung batatapas ai lagi sampai tuntung, bila-bila kah mambulik akan nya.kada tahu ai sudah. Mun sudah tabulangkir tu lambaat bulikan nya. Apalagi ari sa hujan hujan ja.
Ayu ai nah bagamat! Pina asa kipa pang sudah, bawa istirahat dulu nyaman isuk asa sigar awak. Cabut….!