Selasa, 11 Agustus 2009

Ma Unjun Pulang!


Musim ma unjun sudah kada tapian rami lagi, tapi masih rahat haja buhannya tulakan, kamana-manakah jua kah nang dituju, tangah hari tulak jua bakandaraan manulusakan kahandak nih, supaya kawa ma unjun, biar kada tapian rami ha iwaknya asal ma unjun, sambil mahadang-hadang ampun kalotok nih….banyak jua bubuhan gambut nang datang ba cu’ur handak ma unjunan, bah sakalinya rami haja buhan pa unjunan ni tulakan, pang rasa tie buhan kami haja nang tulak ma unjun, ieh….sakalinya kahada…artinya kada tasalah jua kami hari ini ma unjun, balalu ta umpati buhannya tulak ma unjun ka padang bundung, dalam hatiku ni pacang bahayau tu di padang, napang mun tulakan bakalotok haja parak sa jam, hanyar am sampai. Nang ngaran ma umpati lahai…kada tasalah jua, asal surang tahu lokasi nang hanyar, lawan kaina-kainanya kawa ja mahuluakan ka kawanan nang lain mun handak tulak tahun kaina….ya kalo?
Mun dirasa-rasa lokasi nang ini asa ba kuliling-kuliling haja…tapi nang ngaran di tangah padang eih…jauh jua ai…., siip dah! kayapakah-nang kayapakah….nang panting hari ini kawa ma ulur, ujar urang tu jarujutnya barang asal ma unjun! Hehehehe….
Imbah sampai di lokasi….kacapilan buhannya baloncat pada kalotok, asing-asingnya mancari lokasi nang pina patut di unjuni…sambil kuciakan pang buhannya tu ku dangar.
“ kamarian ambili kami lah, tok! Buhannya mamadahi ampun kalotok, buhannya kada tahu ngaran si ampun kalotok pinandu urangnya haja sakalinya, balalu kaitu ai buhannya ba kiyau.
“ ieh, kaina kakamarian sadikitlah ku hadangi”, jar nang ampun kalotok manyahuti.
Samara-samar bunyi kalotok maninggalakan lokasi kami nang handak ma unjunan. Buhannya sudah bapancai kasitu kamari mancari lokasi nang pina patut wan banyak iwaknya, mun pina asa kada mamatuk ba ugah ka subalah, kaina ba ugah kasubalah pulang, sasain bajauh-bajauh haja tu, tapi pang kada rahat banar jua ba ugah tampat, ta talu ikung ba ulihi….pina asa kada mamatuk….pindah ka subalah….mintu ah..

Mun asa haus bawa minum atawa mun pina asa muyak bawa baroko, sambil marasa akan jarujut…kalo pina kawa di bingkas atawa di sisit…malaran…sa ikung pulang ba tambah…takananya haruan nang manyambar!...umaaa….asa malibuk dada takajut kajut langsung hanggus ja lagi, napa ada! Tajurinting jua ai…kakalupuk…kana sisit, napang sa patuk-patuk, balalu nang di higa manyiret ai.. mata…sambil gagarunum,” nah iya itu, napa lagi!...sambil manangkap wan mamaculi kawat nang sangkut di muntung iwak tu, lalu mambuat ka bakul, tapi habis itu ingar satumat….bajauh pulang keina ja mambuliki, mahadang kada ingar.
Hayau-hayau tadapat susumuran….napa da! pada balantak disitu-situ haja lagi, jangan tahu urang!….nang panting saurang sisit tarus iwaknya, asa nyaman pang hati…papuyu nang mamatuk ganal-ganal. Kawan gin asa kuler ma hiyau. Lumayan banar pang pakuleh surang…asa tabanyak pada biasanya, hehehehe…

Banyu minum habis dah, nang di kutup kadada lagi, hari sasain kamarian, ruku dua batangan nya lagi, bagamat ai nah ba ju’uk ka ampah kalotok nang mahadangi..sambil manyimpuni peralatan perang eih…unjun mintu ah…, barat jua pang bawaan ni…napa mun bakul nang asalnya kosong ba isian wan iwak hasil unjunan tadi...
Imbah langkap buhannya takumpulan, babuatan kakalotok….bulikan! sampai…masing-masing ai pulang ma ulur kandaraan gasan bulik karumah masing-masing.
Kada kisah tu pang!...jaka hari libur tarus, bisa ma unjun haja gawian! Wakakakakakkkk….

10 komentar:

  1. nah .. nyaman dipanggang nang dipiring tu bang ai .. hihihihi

    BalasHapus
  2. gananlnya..lawas kada makan papuyu nah,,,

    BalasHapus
  3. Ngalih hai..bubuhan paunjunan ne..mun sudah hobi...kaya apapun kondisinya tatap ae..tulak..
    btw, wah di sanga nyaman tuh iwaknya ditambah sambal acan pulang....heeeeeemmm....

    BalasHapus
  4. glek jg ka car nach .malihat .....

    BalasHapus
  5. ma nyamannya iwak papuyu...

    BalasHapus
  6. diapai iwaknya? disanga kah? dibanam?

    BalasHapus
  7. nia: ya am dasar nyaman banar di ubar, apalagi mancium aromanya...ssssttt,,,jadi lapar lagi nih
    manusiahero: dasar ganal2 kam. napang nang di unjuni susumurannya.
    yulian bjm: nang kaya itu pang buhan kami ni,mun ada nang mambawai, kawa di tulaki umpat,beh....hancui tu pang iyuiiii....
    bana_online: hahahaha....titikan liur sidin hanyar nang mantahnya,kayapa nang masaknya lah ai...
    fahrizal: nang saikung mintu jua....hehehe kacai....
    caCabi: disangan wan banam-banamnya ai...sapalih di campur ka gangan asam....hehehe...asa lapar pulang mandangarnya.

    BalasHapus
  8. Kapan2 mancing ke terusan tengah aja, kira2 2,5 jam dari kapuas kalo naik kelotok. Banyak lho ikannya. papuyu juga ada. :)

    BalasHapus
  9. aku minta alamat ikam ja dulu dry ai...kayapa?

    BalasHapus
  10. enak banget kalau yang ada di piring tuh, di banam..............

    BalasHapus

TERIMAKASIH JIKA ANDA SUKA BERKOMENTAR!